Tartankii Qur’aanka ee Gobolka Mudug oo soo gaba gaboobay (Sawiro) Gaalkacyo 11/06/2017:

Tartankaani oo noqonaya kii 4aad ee ay qabato Mu’asasada Alminhaaj ee Gobolka Mudug ayaa waxaa Xaflad weyn oo lagusoo gaba gabaynayay lagu qabtay Masjidka Abii Hurayra ee Magaalada Gaalkacyo.

Tartanka ayaa wuxuu soo bilowday Maalintii Khamiista 08.06.2017 oo ku beegnayd 13.Ramadaan.1438 waxaana ka qayb galay: Gaalkacyo, Galdogob, Balibusle, Cagaaran iyo Dhagaxyacade, guud ahaan Ardayda ka qayb galay waxaa tiradoodu ay ahayd 62 iyada oo laba ardayna aysan u suura galin inay ka qayb galaan.

Dugsiyada ka qayb galaya ayaa waxay ahaayeen:

Gaalkacyo : (Bukhaari, Ubayyi binu Kacab 1, Ubayyi binu Kacab 2, Cumar binu Khadaab, Nuurul-yaqiin, Umul-qura, Qalam, Daarul-biri, Maxmuud Khaliil, Daarul-hidaaya)

Galdogob: (Furqaan, Umul-qura, Rawda)

Balibusle :(Tawxiid), Cagaaran (Sunnah), Dhagaxyacade (Imaamu Maalik).

Munaasabada gaba gabada Tartanka ayaa waxaa ka hadlay Dr.Aadam Maxamed Cigaal waxaana uu bogaaday Tartanka isagoo Adkeeyay Muhiimada ay leedahay in Degmooyinka Gobolka oo dhan ay kasoo qayb galaan Tartanka, waxaana uu cod dheer ugu yeeray Degmooyinka Magacaaban ee aan kasoo qayb galin Tartanka Sanadkaan.

Gudoomiyaha Mu’asasada Alminhaaj ee Gobolka Mudug Cawil Axmed Muumin ayaa waxaa uu ka hadlay Muhiimada Tartankaan iyo Ujeedooyinkiisa waxaana uu sheegay inay rajaynayaan Ardayda Tartanka Kaalmaha hore ka galay in ay Tartanka Guud ee Heer Puntland ay Guul kasoo hoyn doonaan.

Yaasiin Maxamuud Takar Maareeyaha Shirkadda NEPCO oo maalgalisa Tartanka ayaa waxaa uu sheegay inay Diyaar u yihiin Horumarinta Barnaamijkaan iyo kuwo Khayriga ah ee Xiriirka.

Imaam C/wahaab Maxamuud Gurey oo Xaflada soo xiray ayaa waxuu bogaadiyay Cid walba oo Tartankaan ka shaqaysay waxaana uu Waalidka uga digay Sadex Cilad oo Caruurta ka hor istaagta inay si wanaagsan wax u bartaan waxayna kala yihiin (Banooni, Moobayl iyo Talafishin).

Gab gabadii Xafladda waxaa Shahaado Sharaf la gudoonsiiyay Maamulka Shirkadda NEPCO, Maamulka Masjid Abii Hurayra iyo Gudigii Garsoorka ee Tartanka, iyada oo la abaal mariyay Ardaydii Kaalmaha Hore ka galay Tartanka Quraanka ee Gobolka waxayna kala ahaayeen:

Mu’asasada Alminhaaj Gaalkacyo

C/raxmaan Bilaal Caad